کابل (پژواک، ٢٤ چنګاښ ٩٦) : په افغانستان کې د ناټو او امريکايي ځواکونو قوماندان وايي چې د داعش ډېر وسله وال افغانان نه، بلکې بهرنیان دي او افغانان يې له ناخوالو سره مخ کړي دي .
په افغانستان کې د ناټو او امريکايي ځواکونو لوى قوماندان جنرال جان نېکولسن دغه څرګندونې د چنګاښ په ٢٤مه، د ناټو د روزنې ماموريت په مرکزي قوماندانۍ کې له افغان ځواکونو سره د قاطع ملاتړ ماموریت امنیتي همکاریو په برخه کې د امنیت د انتقال د ګډې قوماندانۍ (سیستیکا) د قوماندان د بدلېدو د مراسمو پر مهال خبريالانو ته وکړې.
هغه زياته کړه چې په تېر یو کال کې د امریکا او افغان ځواکونو د ګډو عملیاتو په پایله کې د داعش د خراسان ولایت ډله ډېره ځپل شوې او په دې موده کې یې د نورو ډېرو جګپوړو قوماندانانو سربېره د داعش درې مشران هم وژلي دي.
نوموړي وويل، درې ورځې مخکې د داعش د خراسان ولایت امیر ابو سعيد په کونړ کې په یو هوایي برید کې ووژل شو.
د هغه په وينا، دا په تېر یو کال کې د داعش درېیم امیر دی چې له خپلو افغان ملګرو سره د عملیاتو په پایله کې وژل کېږي.
جنرال نېکولسن وايي : (( لکه چې خبرياست له تېرکال راهیسې د داعش پر وړاندې عملیاتو ته دوام ورکوو، په ځانګړي ډول د مارچ د میاشتې راهیسې، موږ اوس د دغې ډلې د وسله والو په شمېر کې ډېر کمی ونیو، موږ د هغوی درې امیران ووژل او هم موږ په لسګونو د هغوی لوړ پوړي مشران وژلي دي. ))
د امريکايي او ناټو ځواکونو قوماندان وويل، د امریکا پوځ د افغانستان په هرځای کې د داعش پر وړاندې عملیات ترسره کوي، خو هغه زياته کړه چې دا عملیات یې په ځانګړي ډول د ننګرهار د اچین په ولسوالۍ، کونړ او حتی د جوزجان په ولایت کې د داعش ډلې پر وړاندې ترسره کړي دي.
د جنرال نیکولسن په وينا، د داعش پر وړاندې به دا عملیات د دغې ډلې د بشپړې ماتې تر وخته په افغانستان کې ادامه ومومي.
هغه زياتوي : (( د داعش ډېر وسله وال افغانان نه دي، دا بهرنیان دي چې افغانستان ته راځي او دلته افغانان له ناخوالو سره مخ کوي، موږ به له افغان حکومت سره د دغې ډلې له منځه وړلو لپاره کارته دوام ورکړو . ))
د ناټو قوماندان وايي، که چېرې داعش خپل څلورم امیر هم وټاکي دوی به یې ووژني.